3月10號係世界腎臟日。腎臟有四個主要功能：將多餘水分排出、維持礦物質同電解質平衡、製造荷爾蒙刺激紅血球生長，以及調節血壓同強化骨骼。高血壓同糖尿病都會增加罹患慢性腎病機會，假如腎功能受損，可以導致嚴重健康問題，絕對唔可以輕視！現時本港約有80萬名糖尿病患者，好多人誤會慢性腎病無得預防，但保持健康生活已經有效減低患病風險，我哋不妨參考以下5個貼士：
1.均衡飲食
每日攝取少於2000毫克鈉有助降低患上高血壓風險，從而減低罹患腎病機會。我哋應該依照健康飲食金字塔建議，減少進食醃製及加工食品，多選擇低油、鹽、糖及高纖食物。
2.避免吸煙
吸煙可引致動脈粥狀硬化，減慢血液流入腎臟，影響正常運作，仲增加腎癌機會！要維持腎臟健康，一定要避免吸煙！
3.減少飲酒
酒精會影響血壓，增加罹患高血壓風險。減少飲酒唔單止幫助維持健康血壓水平，更可以保持腎臟健康。
4.多做運動
運動習慣有助減低患上糖尿病同高血壓嘅機會，從而降低腎病風險。即使疫情無法外出運動，都要保持每星期進行至少150分鐘中強度、或75分鐘高強度運動。
5.正確服藥
部分非處方藥物，例如止痛藥或者草本藥物，都可能會對腎臟構成傷害。所以我哋要按照醫生指示服食藥物，千祈唔可以亂食藥啊！
好多慢性疾病都同我哋嘅生活習慣息息相關！趁住今日3月10號係世界腎臟日，等我哋許下健康承諾，由生活層面預防慢性腎病喇！